Publié dans le quotidien ourdou “Inquilab” (Inde) le 12.12.2022

 

۔ پال ایلُوار

 

 

مُترجم : شاہ زماں حق

صدر شعبہ اردو، انالکو، پیرِس، فرانس

 

اپنی درسگاہ کی مشقی تختیوں پہ

اپنی میز پہ اور درختوں پہ

ریت پہ اور برف پہ

میں لکھتاہوں تمہارا نام

 

تمام پڑھےہوئےصفحوں پہ

ہرخالی صفحے  پہ

پتھر، خون، کاغذ ہو یا راکھ

میں لکھتاہوں تمہارا نام

 

سُنہری تصویروں پہ

جنگجوؤں کے ہتھیاروں پہ

بادشاہوں کے تاج پہ

میں لکھتاہوں تمہارا نام

 

جنگل میں اور بیابان میں

گھونسلوں پہ اور پیلے پھولوں کی وادیوں میں

اپنے بچپن کی گونج پہ

میں لکھتاہوں تمہارا نام

 

راتوں کی پراسراریت پہ

اُجالوں کی سفید روٹیوں پہ

لَگَن کےموسموں پہ

میں لکھتاہوں تمہارا نام

 

اپنی تمام نیلی جھالروں پہ

دھوپ میں تالاب کی پھپھوندیوں پہ

چمکتے چاند کی جھیل پہ

میں لکھتاہوں تمہارا نام

 

میدانوں میں، اُفُق پہ

پرندوں کےپَروں پہ

چَکّی کی پَرچھائیوں پہ

میں لکھتاہوں تمہارا نام

 

سحر کی ہرکرن پہ

سمندر پہ سفینوں پہ

مست و مخمور پہاڑوں پہ

میں لکھتاہوں تمہارا نام

 

بادلوں کے گالوں پہ

برق و باراں کے پسینوں پہ

تیز و مہین بارش پہ

میں لکھتاہوں تمہارا نام

 

ضوفِشاں طرز حیات پہ

رنگ برنگی گھنٹیوں پہ

مادی حقیقتوں پہ

میں لکھتاہوں تمہارا نام

 

روشن چراغ پہ

بُجھتے ہوئے چراغ پہ

اپنے تمام سمیٹے ہوئے آشیانوں پہ

میں لکھتاہوں تمہارا نام

 

تراشےہوئے پھلوں پہ

آئینے پہ اور اپنی خواب گاہ میں

اپنے ویران بِستر پہ

میں لکھتاہوں تمہارا نام

 

اپنےدروازےکی دہلیز پہ

روز مرّہ کی اشیا پہ

مقدّس آگ کے الاؤ پہ

میں لکھتا ہوں تمہارا نام

 

نذرانے میں دیے گئے گوشت پہ

اپنے دوستوں کی پیشانی پہ

ہربڑھےہوئےہاتھ پہ

میں لکھتاہوں تمہارا نام

 

حیرانی کےآئینوں پہ

اپنے متحرک  لَبوں پہ

خاموشیوں سےپرے

میں لکھتاہوں تمہارا نام

 

اپنے تباہ حال مکانوں پہ

اپنے گرے ہوئےمَناروں پہ

اپنی اکتاہٹ سےلیس دیواروں پہ

میں لکھتاہوں تمہارا نام

 

بے طلبی کی کیفیت پہ

برہنہ تنہائی پہ

موت کے زینے پہ

میں لکھتاہوں تمہارا  نام

 

اپنی بیماری سےصحت یابی پہ

نامعلوم خوف پہ

بِنا یادداشت والی امید پہ

میں لکھتاہوں تمہارا نام

 

اور ایک لفظ کی چمک سے

میں اپنی زندگی کادوبارہ آغازکرتاہوں

میں پیدا ہوا ہوں تمہارے شُعور کےلیے

تمہیں نام دینے کے لیے

“آزادی”

 

<a rel="license" href="http://creativecommons.org/licenses/by-nc-nd/4.0/"><img alt="Creative Commons License" style="border-width:0" src="https://i.creativecommons.org/l/by-nc-nd/4.0/88x31.png" /></a><br />This work is licensed under a <a rel="license" href="http://creativecommons.org/licenses/by-nc-nd/4.0/">Creative Commons Attribution-NonCommercial-NoDerivatives 4.0 International License</a>.

 

---

---